24.01.2009
1 Motorhome, 4 Cars, 1 SHIT BIN und kein Schade!
Liebi Frosties!
Jo, bi ues isch schoen warm. 27 Grad in Adelaide. Und was mached mir? Mir hocked dinne und schriebed eu. S’letscht Mol fuer die noegschte 2 Wuche. Nei, mir goend noed zruck uf Fiji aber au do im Outback werded mir kei Internet finde. Geschweige denn Mobilfunknetz. Drum wundered eu noed, dass ihr nuent ghoered, falls ihr oeppis vo ues wuesse woend… 
!
Aber z’erscht nomol zruck uf Sydney. Am Friitig hend mir 2 Local Guides gha. D’DEE wo mir vo Fiji kennt hend und ihri Kollegin hend ues dae Bondi Beach zeiget und ues mit in australische Usgang gno. Aen Gmuetliche mit feinem Aesse, Kino und SCHOGGI! We love Max Brenner!
Dae Samschtig hemmer im Olympia Parc vobrocht-da gaeb aes geils Turnfescht dette-und d’Nacht duere simmer mit mae Car uf Melbourne gfahre worde.
Melbourne. Natuerlich hend mir alli Touri Puenkt abklapperet. Queen Victoria Market, Rod Laver Arena, Docklands, St. Kilda, Southbank, Fedsquare, Rialto Tower, City Circle Tram und und und. Mae glaubts chum: do isch aes no schoener wae in Sydney!
Denn, am Samschtig. Endli wieder aes fahrbars di Hei. Nu mir zwei. Ein Campervan. Ae absoluti Schiessi. Kei Servolenkig (d’Andrea haet jetzt wieder Oberarmmuskle!), stinkt, isch luut (mir hend ues bim Fahre nu no agschraue-nei, noed gstritte, mir hend ues nu noed ghoert!), d’Melanie weiss bis huet noed wie abschluesse, s’Bett isch hart, am Morge lauft er noed aa und d’Bremse quietsched, mae ghoert ues scho 2 Doerfer vorher. Churzgfasst: ae baari Katastrophe. Ae raechti Shit Bin!!! Defuer hend ues no nie so viel Luet gwunke. Jo liebi Eltere: mir sind unbeschadet in Adelaide acho. Mir choends selber chum glaube!
Guet, mit dem Traktor sind mir quer durch Melbourne as AAMI Classics Final. Dett hemmer grad zerscht d’Carolyn kenneglernt. Uesen rettende Aengel, sie zeigt ues nochem Spiel Campingplaetz-aber meh dodezue nacher. Huiuiui, vorem Finalspiel sind dae Roger und dae Stan gad vor uesere Nase dure-mer hetteds fascht beruehrt! Ui, big excitement 
! S’Finalspiel isch denn ae churzi Sach gsi-dae Roger haet i guet 55 Minute gwunnae-aber hei mir hend zerscht as anderae Endi vo dae Welt muesae zum di beschtae zwei Schwizer spielae z’gseh… Denn hemmer ae Autogramm vom Stan ergatteret und dae Roger eifach namal vo noechem bestuunet. Hend ihr gwuesst, dass d’Mirka abgnoh haet?!? Mir hend sie fascht nuem kennt 
! No voellig usem Huesli hend mir d’Carolyn gsuecht. Voluuter Mitleid haet sie ues grad zu sich Hei zum schlofe iiglade! Da Agebot hend mir noed choenne usschloh! Zur Feier des Tages haet sie grad aen Schaempis knalle loh! Und uesi Woesch gwaesche. Und z’Nacht cho loh. Und aen Wii ufgmacht. Und als ob’s noed gnueg waer haet ues eri bescht Fruendin grad auno fuer dae noegscht Tag zum Barbeque iiglade. …boah, mir hend sie nuno mit grosse Auge aglueget…so lieb…so net…da git’s doch gar noed…mit wa hend mir da vodient…
Dae Sunntig und s’BBQ sind absolut kuhl gsi. Z’erscht ae Bootstour, denn Apero, z’Nacht und eifach s’Zaemaesii mitere grosse Local Family haet ues super gfallae. Dae Tag werded mir nueme vergaesse.
Schweren Herzens hend mir ues vo dae Carolyn voabschiedet und sind Richtig Great Ocean Road gfahre. Bim erschtae Halt in Angelsea haet d’Andrea ihri erschte Surfvosuech gstartet. Chapeau, gad gstande. 2 Stundlang. Bruunbroennt und Freudestrahlend isch sie mitem Brett underem Arm usem gschwebt ! Und wiiter gohts. Am Mittwuch sind mir scho dae 12 Apostels begegnet. Moll, die sind no nett, die gfalled ues no. Im Ernscht? Amazing, awesome,…s’git noed gnueg Wort defuer und au noed fuer d’Great Ocean Road. Au nach 4 Moenet Reise chas ues no d’Sprooch voschloh. Und fuer all die wo ues guet kenned: Ihr wuessed, dass da oeppis heisst!
Jo, dae Raescht hend mir mit fahre vobrocht. Will’s ues fascht furtgluftet haet sind mir au meh oder weniger dureghoetterlet. Bis zum Wildlife Parc. Bloed, mir hend dae Rucksack i dae Shit Bin vogaessae. Suscht waered mir jetzt stolzi Bsitzerinne vomene echte kuschelige Koala. So hend mir ues moesse begnuege, ihm s’Fudi z’streichle. Dae isch voll flauschig! Jooooooeeeeehhhhhh… Und jessess, sind die langsam ! Aber so herzig… Mit dae Kaengurus haets au funny Pictures geh-die sind naemli au uu herzig und hend ues sogar us dae Hand gfraessae! Ae wiiters Highlight uf uesere Aussie-Tour. Und wa fuer eis!!! We love Tierli!
Nachdem mir endli uesi Shit Bin abgeh hend choend mir saegae, dass mir’s gschafft hend: Kein Unfall oder irgendaen Schade mit gmietete Fahrzueg. Und da isch oepe aes Vehikel gsi! Phu-Mami’s, do sind ihr sicher au erliechteret. Mir au.
Dae Rescht sind nu no organisierti Tourae. Morn gohts is Barrossa Valley go australischi Wii probiere, denn 2 Taeg uf Kangaroo Island bevor’s fuer 8 Taeg is Outback nach Alice Springs goht. Mir freued ues mega!
Bis zum noegschte Mol gnuessed dae Schnee und Hoehesunne! Oder freued eu ab uesne Bilder !
Schweisstriebendi Gruess
Surfergirl Andrea und Koalabaerli Melanie
