rondom

In Hanoi (Vietnam) hend mir aen Klimaschock erlitte. 15 Grad, Regae und Nebel. Mit so oepis hend mir fruehschtens i dae Schwiiz graechnet! …brrrrrrrr…! Trotzdem hend mir aen Usflug nach Halong Bay gmacht. Isch no meh chalt gsi, aber gorgeous! 2 Taeg isch sSchiff ueses di Hei gsi und mir hend ae atemberaubendi Hoehli bsuecht. Die haet uebersetzt Hoehli vo dae Ueberraschige gheisse! Zum Glueck chan ae Klimaalag au heize-Tee aellei haet ues noed warm ghalte.

Vo Hanoi sind mir miteme Bettaebus (Pfusibus ) i 2 Taeg nach Saigon duest. Mol, spezielli Erfahrig gsi. Mir hend so viel vo dae Landschaft vo Vietnam choenne bestuune-pretty amazing!

In Saigon sind mir uf dae Spure vom Chrieg gsi. Very interesting-tough stuff. Isch ues aso raecht noech gange, all die Bilder, Ziitigsbricht, Erchlaerige,… Wiiter sind mir in Palace vo dae Reunion. DBeschriebig Jamesbondfilm us dae 60er Johr trifft perfekt druf zue !

Zur Abwechlsig mol mit mae …Bus… sind mir nach Phnom Penh (Cambodia). Dae Mr. Ya-uesen TukTuk Driver-haet ues die Stadt und dGschicht vo Kambodscha noecher brocht. Au das isch mega interessant gsi! Vo dett sind mir mitaem Speedboat nach Siem Reap gspeedet ! Wie die einte vo eu wuessed: DIE Tempelstadt schlaechthin! Drum hend mir am druffolgendae Tag ae Tempeltour by TukTuk gmacht. Naaaaaaaiiiiiii, au jetzt sind mir weder Tempel-, no Reise-, no Foetlimued. Mir choends selber chum glaube! Vo dette sind mir do ane -Koh Chang-gange.

Koh Chang. Mir fuehled ues wie 2 Prinzessine. Sunne, Strand, Liegestuehl, Bungalow, zMorgebuffet, Himmelbett, … Uiuiui, big excitement. Eifach nomol so richtig gnuesse und ues mit aem Heigoh usenandsetzae. Do sind mir jetzt also. Morn fahred mir nach Hongkong…aehhh…nei, denk Bangkok (I lerns glaub nie!!). Da waers denn aso gsi.

Schlusswort:

Hochverehrti Leserinne und Leser

In 70 Stunde setzed mir nach 6 Monet reise wieder Fuess uf schwiizer Bode.

A daerae Stell moechted mir ues bi uesere treue Leserschaft vo Herzae bedankae. Mir hend ues immer wieder ueber Kommentaer, SMS, Email und Nochrichte uf Facebook gfreut. Aes isch schoen zgspuere becho, dass mae so wiit waeg vo dae heimat isch und gliich so viel a eim denkt wird. Jetzt freued mir ues so richtig, all uesi Liebschte wieder in Natura zgseh! Und natuerlich langsam wieder in Alltagstrott inezcho.

Hajo, und viellicht hani dAndrea no laenger a dae Baggae !

Bis sehr fescht bald i dae Schwiiz

Eui treuergebene, gruenteesuechtige Autore, Hauptdarsteller und Fotografe

Andrea und Melanie

Abspann:

Fuer alli, wos interessiert: mir hend so dSchnauze voll vonenand, mir striitted fangs jede Tag und sind soooooooooooooooooo froh, endli mol wieder normal denkendi und redendi Mensche um ues zha!!

Und jetzt no dWohrheit: i dem ganze halbe Johr sind mir 2x2Stunde vonenad trennt gsi-und beidesmol isch aes ues vorcho, als ob ues oepis faehlt. Isch das noed aes schoens Fazit?

AdAd, we will be back!

The End. Done.

Bangkok

Floating Market

Ayutthaya

Chiang Mai

Treking Tour

Ueses Schlofhuus, Duschi und WC

So gseht aes Bamboo-Raft us!

Chiang Mai

Traditionells Aesse mit Unterhaltig

Luang Prabang in Laos

Hanoi

Ha Long Bay

Ueses floating di Hei

UNESCO World Herritage

Ae cheibe Woehli i daere Hoehli

Vorbereitig fuer d´Schwiiz- brrrrrrrrrrrrrrrrrrrr…!

Sa Bai Dii

Stelled eu da vor, sogar in Laos hends Internet! Und da mir uf dae FLug muend warte hend mir denkt, mir gaebed nomol aes Lebenszeichae. Und wa fuer eis !

Wiae ihr jo wuessed, sind mir ueber Singapore nach Bangkok gfloge. Nei, noed Hongkong. Au wenn d’Melanie das immer wieder behauptet… In Singapore hend mir d’Nacht im FLughafe vobrocht. Ui, isch das luschtig gsi! Nach Terminalhopping sind mir usem Tuefschlof (oder so…wenn mae da so nennae chan uf dennae harte Liegene) grisse worde: 3 jungi Manne in Uniform hend uesen Pass und Boardingpass woelle gseh! Nach mae Churztrip dur die ach so schoeni Stadt simmer schowieder im Flugi ghocket.

Bangkok. Wunderschoen. Uff, mir hend gmeint, Thailand seg schoen?!?!?!?! MIr hend a 2 Taeg eifach Usflueg gmacht zu 3 Tempel, Royal Palace, Floating Market, Snake Farm, Crocodile Show, Elephante Show,… Isch ok gsi, aber noed so dae Boerner. Und s’Aesse vo dae Stross-naja, haet ues noed so umghaue und agmacht… Zum Glueck hend mir denn am Sunntig dae Zug nach Ayutthaya gno. Dae netti TukTuk-Fahrer haet ues denn au grad uf Tempeltour gno. Boaaahh… Vo do a haet’s ues immer besser gfalle. Die Tempel und Ruine sind absolut umwerfend! Mir sind au jetzt nonoed mued zum unzaehligi Pictures knippse! S’gseht alles us jedem Eggae eifach wieder anderscht und schoen us! Und au s’Aesse isch do viel meh besser!

Am Maentig sind mir denn wiiteri 10 Stund mit aem Train nach Chiang Mai ghoetterlet. Und denn doette dae Empfang:” Hoi, Du bisch sichr d’Andrea!?” Mir hend drum aes schwiizer Guesthouse buechet ! Hai, isch das schoen do. Und sooooooooooooo guenschtig! Und sogar d’Raucherstaebli schmoecked fein und passed perfekt! Voller Elan sind mir zu dae noegschte Tempel. Und mit mae TukTuk zunere Siidefarm und Schirm-Malerei. Phu, ganz schoeni Sache hend die do-nu leider noed so eifach zum transportiere. Aso hend mir’s nume uf ues wiirke loh. Hou !

Am noegschte Tag haet ues scho dae JayJay abgholt. Dae Schlitzi-Tourguide, wo ues und 8 andri Touris zu Wasserfaell und Hilltribes mitgnoh haet. Aber z’erscht sind mir am Dumbo sim Mami uf dae Rugge ghocket. Drus cho? Jo, richtig, Elephante-Riite! Hui, isch das aen Spass gsi! Klein Dumbo und sis Mami (mit ues ufem Rugge) hend sogar lostrompetet-toerroehhh! Und scho isch aes 3 Stund z’Fuess dae Hill uf ines abglegnigs Bergdorf (Hilltribe). Mit Natelempfang. Und Chipsli. Und Bier. Und und und. Und joeh, d’Andrea isch vo dae Chind heiss gliebt worde! Oeb sie jetzt Tierli mit Hei bringt ? Nachem super feine Thai Curry sind mir uf d’Bambusmatte go probiere pfuse. So ab aem 4i hend die x-tuusig Gueggel alles geh.

Nach 2 Stund wieder dae Hill ab isch White Water Rafting ufem Plan gstande. Naja, mir wuerded da Schluchboetle uf dae Thur nennae. Defuer isch s’Bamboorafting gad aschluessend kuhl gsi! Im Wasser sitze und triibe loh! Und da waer’s schowieder gsi! Hai, isch das Bett am Obig bequem gsi!

Dae Friitig hend mir eifach no chli in Chiang Mai und sine Tempel vobrocht, bevor mir am Obig in Usgang sind. Neeei, noed so Usgang. Traditionelles Kantoke Dinner und asiatischi Taenz. oooooohhhhhhhh…mai, isch das schoen gsi. Super Aesse, gediegeni Atmosphaere, typischi Taenz,… So wiae mae’s sich vorstellt!

Am Samschtig isch s’grosse Abentuer losgange. Mir hend ues uf dae Waeg nach Laos gmacht. Mit Mini Van ad’Grenze und doett imene Loch uebernachte. Mit aem boetli sind mir am Morge frueh ueber dae Mekong nach Houay Xai (Laos). Buerokratie und Arroganz!!!!!!!!!! Aber sie hend ues ineloh. Uff. Eigentli hetted mir jo soelle s’Slowboat neh. Aber nach dere angschtiifloessende Speach vo dem Halsabschnieder hend mir ues fuer dae 6h-Trip mit aem mini Van nach Luang Prabang entschiede. Nach 12h sind mir denn au mitte i dae Nacht do acho. Im Nochhinein simmer echt froh, hend mir ues fuer da entschiede. Dur das hend mir unzaehligi uf Staecke baute Doerfli gseh und d’Landschaft isch so sicher beiidruckender gsi!

Luang Prabang. S’erscht Mol, wo mir vomene Wasserfall hin und weg gsi sind!  Au d’Tempel sind immerno u schoen und dae Nightmarket haet jetzt ae paar Schal weniger ! Aes u herzigs, gmuetlichs, franzoesisch aghuchts Staedtli mit no besserem Aesse!

Do waered mir jetzt aso! Mittlerwiile sind mir au viel schlauer (=misstrauisch) und handled was das Zeug haelt ! Und nei, mir sind immernonig reisemued! Mir hend no 3 Wuche-und die werded nomol so richtig gnosse!

Die noegscht Wuche werded mir in Vietnam sii und denn nomol ae Wuche in Cambodia, bevor’s zum Erhole uf Ko Chang an Strand goht 8-) !

Kop Chai Lai Lai fuer’s geduldige Laese! Und noed vogaesse: gnuesseds noh, i 3 Wuche hend ihr ues wieder a dae Bagge! Mir choend all no bloed schnorre !

Liebi Gruess vo dae 2 i Siide-Wulle-Bast-Batik-Voliebte sich-selber-findende esoterisch-aghuchte-Rastafaris