rondom

Aloha!

Das git aen langae Bricht. Ui, wenn hend mir s´letscht Mol gschriebe? Ok, Highway 1, vo Santa Cruz nach Malibu dae Kueschtae no. In Malibu hemmer eine uf Mitch Buchanan (Baywatch) gmacht und sind mit dae Boje aem Strand no ufe und abe gsecklet. Die Fahrt waer sicher no viel meh schoen gsi, waered noed a teils Stelle d´Wolke so tuef gsi. Aber warm isch aes wuerklich gsi bi 27Grad… !

Am letschtae Mittwuch hend mir denn uesen Camper (minus 1 Radchappae) abgeh. Aber uesen treuherzige Hundeblick haet ues eimol meh wiiterbrocht und diae $80 sind ues gschenkt gsi ! Underdessae wuessed mir, wiae mir´s machae moend. Drum simmer vom Shuttle anstatt an Flughafae is Hostel gfahre worde.

I uesem 20er Schlag hemmer ues ignischted und sind am Dunnschtig id´ Universalstudios. Mir wuessed jetzt ganz vieli bschnissni Sache vo dae Film und hend defuer au vieli Stars und sternli troffe. Shrek, Familie Simpsons, D´Mumie, Dino´s us Jurassic Park, dae Desperate Housewives hemmer Szenenae vodorbe, und und und… Isch wuerkli aen erlaebnisriiche und laessige Tag gsi. Obwohl fascht kei Luet det gsi sind und mir nie agstande sind, isch dae Tag ratzefatze umegange.

Next day: Bustour zum Venice Beach, dur Santa Monica, bim Hochhuus us ¨Stirb langsam¨ ueber dae Rodeo Drive wo d´Julia Roberts in ¨Pretty Women¨g´shoppet haet nach Beverly Hills bis mir schlussendlich ufem Walk of Fame acho sind. Endli s´Hollywood Zeichae! Isch au interessant gsi, bsunders will ues so viel Plaetz us voschiedene Film bekannt gsi sind. Dae Rueckwaeg isch denn weniger luschtig gsi. Nume, will´s ufem Santa Monica Blvd ae doofi Halloween Party mitere halbe Million Gstalte gha haet. Zum Glueck sind mir im Hostel noed di einzige gsi, wo da boykottiert hend.

Nachere churze Nacht isch´s am morge frueh scho uf Honolulu wiitergange. I uesem Hotel hemmer usem 32.Stock ae super Ussicht ueber Waikiki und Honolulu gha. Selbschtvostaendlich hemmer au dae Waikiki Beach mit all denae Wuerschtli ufem Grill gseh. Hey, do hend d´Sardine i de Buechs jo no meh Platz! Egal, mir hends luschtig gfunde. Fazit: Wer nume am Waikiki Beach Feriae macht, isch selbertschuld, Kulturbanause! Will…

Am noegschte Tag hemmer uesen schnittige Pontiac abgholt (jo, aes isch dae billigscht und chlinscht gsi, wuerkli!!) und hend mol Gas geh. Mir sind dae Biitsches (=Beaches) nogfahre und hend do und doett aen Halt gmacht. Zum Biispiel binere tuerkisblaue Bucht und no viel meh besser: Bi dae Trope vo Jurassic Park/Lost/Pearl Harbor. Dae Josh Hartnett hemmer leider noed gseh, aber diae Landschaft… Mir sind voellig ueberwaeltigt gsi. Links Raegaewald und dunkli Wulchae, rechts Beach, Meer und Sunne. Denn simmer wiiter zum Surfer´s Paradise: Northshore zu uesem Hostel. Will´s no so hell gsi isch simmer wiiter zur Dole-Plantage. Hend ihr gwuesst, wiae Ananas wachsed? Mir noed, aber waer erwartet scho, dass diae ufeme chliine Struch am Bode wachsed??

Gescht morge simmer schowieder am FLughafe gstande. Wiae d´Esel am berg wo´s ues nochaem Piepsichaschte (ohni piepse) noed wiiterloh hend. Sie hend eifach d´Andrea abtaschted und alles durneuslet und Probene us uesne Taeschae gno hend. Ohni ei Wort hends ues gfilzt. Und das nume, will mir churzfrischtig dae Flug nach Kona buecht hend. Denn halt…Dae Flug isch hopplahopp gangae, eimol ufae, churz bliibe, und mit viel geholpe und geruettel abae. Phu, sind mir froh gsi, wo mir acho sind. Im Flughafe wo us paar Huetlli bestoht und ae hawaiianischi Band spielt und tanzt. Geil !

Denn hemmer wieder s´billigscht und chlinscht Auto gmieted. Ok, mir nehmed au aes Mustang Cabriolet !! Mit dem hemmer ues uf dae Waeg nach Volcano Village gmacht. Nu scho uf dem chliine Waeg simmer vo dere abwechsligsriiche Landschaft atue gsi. Und wo mir ueses Dihei fuer 4 Taeg gseh hend simmer erscht raecht hin und waeg gsi. Aes Bed&Breakfast mitte im Raegaewald, riesigs Zimmer mit Waermedeckene und ae no riesigers Badzimmer, und u schoen iigrichtet. Mir sind sproochlos gsi.

Huet morge hend d´Barbara und dae Ernie fuer ues und aes anders schwiizer Paerli z´morge gmacht und ues fuerschtlich bedient. Echt u lieb. Und potzblitz, diae Schwiizerin chunt mir mega bekannt vor. Kei Wunder, sie haet au am gliiche Ort gschafft wiae ich !

Denn simmer in Volcano Nationalpark is Visitor Center aen Ranger go froge, was mir do in 2 Taeg so alles astelle choend. Hai, haet dae gstrahlet wo mir gseit hend, dass mir laenger als 1 Stund bliibed! Hend ihr gwuesst, dass suedlich vo Big Island 3000ft under Meeresspiegel die noegscht hawaiianisch Inslae ¨Loihi¨ am entstoh isch? Und dass sichd´Inselgruppe Hawaii pro Johr 4 inches in RIchtig Japan voschiebt? Tja, uesi Reis isch au lehrrich ! Erschtae Halt isch bimene Krater gsi, wo maechtig Dampf abloh haet. Bi dae Sulphur Banks haets denn bitz gstunke und s´neongaelbe vom Schwefel haet usgseh wiae anegsprayt. Ufere 2 1/2 stuendige Wanderig simmer unter anderem ueber aen erchaltete Lavasee gloffe und dur aen Lavatunnel. Stuun… ! Dae Raescht hemmer nu no usem Cabi choenne aluege, da´s z´viel giftigi Daempf ume gha haet. Isch gliich unbeschrieblich, wenn mol d´Lava drueber gflosse isch und alles schwarz isch. Voeinzlet kaempfed sich aes paar Farn und Bluemli duere.

Bis jetzt simmer voellig fasziniert vo Hawaii. Wiae gseit, nume Waikiki cha´s echt noed sii. Do vopasst mae oepis eimoligs. Wir waren mittendrin statt nur dabei. Apropopos: s´Wahlergebnis hemmer live am TV miterlaebt.

So, jetzt trinked mir no uesen wii fertig und denn wird pfuused. Isch jo au scho 22.17. da heisst bi eu isch jetzt z´Nuenipausae. Aen Guatae und aes schoes Taegli.

Vogaessed noed: i 1monet und 2 Taeg chunt dae Samichlaus. Und dae gseht im Fall alles, mir werde alles erfahre!

Gruess us pa´a´au, han´on´u´hu, Panuna oder so aenhnlich. Bi 17 Zeichae im Alphabet muen do jo alles glich heissae. hend ihr da gwuesst?

Drum: he´bed e´u gu´et so´org

Mahalo all dene, wo bis do glaesae hend.

Andrea und Melanie

Hello again, mir sind´s schowieder!

Huet simmer am 9i scho losgfahre, damit mir am 10i di erschte ufem Parkplatz vo de 49ers sind. Ueber die doppelstoeckig Brugg simmer damol quer dur Frisco duest und Candlestick Stadium gfahre. Aber wieso stauts bi de Usfahrt scho? Mir sind doch so fruaeh. Guet, mir hend diae  vielae, riesige Parkplaetz au schnell gfunde.  Aber wo loends Camper ine? Ok, fuer $50 simmer daebii gsi. Aen super Platz, inmitte vo all denae, wo do scho gschlofe hend. Und was macht au all dae Rauch do?!? Ah, das sind d´BBQ-Grill! Simmer amene Open Air? Nei, jedes Open Air i de Schwiiz isch en Seich daegaegae!! Und mir moend da jo wuesse…

Guet, mir hend dae Fuessweg denn au no zum Stadium gschafft. Mit de Rolltreppe (!!!) isch es denn zu uesne Plaetz ufegange. Au vo de billigschte Plaetz gseht mae sehr viel. Im Ernscht! Mir sind selber ueberrascht gsi. Und denn isch´s losgange. Da isch dae Moment gsi, wo mir gmerkt hend, dass genau gad hinder ues Seahawks-Ahaenger sind und naebed und vor ues Niners-Fans. Ok, da choent spannend werde. Denn sind d´Niners-Noise mit Pauke und Trompete, aes Orcheschter wie us em Film ineglaufe. Gfolgt vonere Horde Cheerleaders. Nochere de IIlauf vo de Spieler. Bi jedem haets au ae Sau-Fuerwerk geh, noed uebertriebe!  Uf das abe isch selbtschvostaendlich live die traditionell Amihymne gsunge worde. Puentklich am 1.15 p.m. isch denn doch no dae Apfiff gsi. Isch echt kuhl gsi! Nu schad, dass uesi Niners voll abgluust hend. Sniff ! Egal, fuer ues haet´s gliich Bier, Hot Dogs (mit alles, Ketchup, Senf, Essiggurke, Zwieblae, halt so wie´s sich ghoert!) und Nachos geh.

Bim Spielstand vo 27:12 fuer d´Seahawks 10 Minute vor Schluss simmer denn gange, damit mir us dem Fahrzuegghetto heil usechoemed.

S´haet sich echt glohnt, sonen Footballevent mol live z´erlaebae. Da mue mae eifach gseh ha, da glaubt mae suscht gar noed!

Auso, jetz bliibed ues nu no 3 Taeg mit uesem fahrbare di Hei und denn goend Tramperferie so richtig los.

Wer weiss, viellicht ghoered ihr nomol vor Hawaii oepis vo ues und falls noed: Happy Halloween…harrharrharr… Noed vogaessae: Trick or Treat! Voteiled brav d´Schoggi-mir aessed sie selber !

Guete Wuchestart, leged warmi Socke a und vogaessed dae Schal und d´Haendschae noed di Hei oder im Bus. Mir schicked eu no chli kalifornischi Sunne-dae Wyy trinked mir selber !

Heaps of Love

Andrea und Melanie

Servus, Gruezi und Hallo!

Happy Halloween! Nei, mae gseht fascht noed, dass es gli sowiit isch. Ei Party a dae anderae, ueberall nur Pumpkins (sogar im Starbucks) und komischi Fratzene. Do in Frisco maerkt mae maengisch noed, wer vokleidet isch und wer eifach nu so usgseht . A gwuesse Ort chunt mae fascht Angsch ueber und mir oeppe mol froh gsi, dass mir unbeschadet Hei cho sind. Aber zu dem spoeter meh. Nei Mami´s, ues gohts guet, s´haet ues no niemert oepis Boeses woelle!

Fuer die wo´s noed wuessed: mir sind nach em Lake Tahoe gad dureghoetterlet (nachere Pause im Denny´s) nach San Francisco. Z´Sacramento haet´s ues eifach noed gfalle.

Am Zischtig simmer zum erschte Mol ueber d´Golden Gate Bridge gfahre. Wie jede Tag sit do, da mir bitz usserhalb ¨Dihei¨ sind. S´erscht wo mir gmacht hend, sind d´Tickets fuer´s 49ers (a alli Sportbanause und Nichtwissende, da isch ae Footballmannschaft) go sichere. Fazit: ¨Mir goend zu dae 49ers, mir goend zu dae 49ers¨ am Sunntig. Wiiter isch aes mit dae beruehmt-beruechtigte Cable Car zu dae Fishermen´s Whorf gange. Hei, da stinkt. No meh haet´s gstunke, wo mir zum Pier 39 cho sind. Alli, wo schomol do gsi sind, wuessed jetzt wa chunt. S´Connyland mit EIM Oskar isch nuet daeege. Mae stelli sich doch so ca. 10 Floesser vor, doett druf wie inere Sardinebuechs bragglet voll nume mit Seeleuae. Und ase aen Laerm. Trotzdem Joeeehh… Usserdem git´s am Pier 39 seeeehr feini Margheritas (we love maggies ) )!

Am Mittwoch simmer mitere Ferry uf Alcatraz. Jo, sie hend ues wieder go loh. Aber isch echt kuhl und iidruecklich gsi. Mir sind uf ¨The Rock¨ gsi, und sie hends au echt guet gmacht. Ae Audiotour, sogar uf duetsch, het ues dur die Ruemlichkeite gfuehrt. Uf da abe hend mir gad ae Maggie brucht .

Dunnschtig. Chinatown het uf ues gwartet. Hei, sind mir vowirrt gsi, aber hoppla du. Hend mir doch woelle friedlich go aessae, aber mir hend nu bahnhof vostande. Fazit: Zur Vorspies hend mir Vanillebroetli gha. Isch u fein gsi. Aber wo mir jo gseit hend, hemmer a) noed vostande, was es isch und b) haet sie ues nachr jedi Vorspies woelle atruellae. Und zwor haet sie´s gad an Tisch brocht, jeglichi Art vo Gschluder ueber Fluhlingslolle uebel vely, vely good… Vostande? Jo, so isch´s ues au gange. Mir hend denn aber glich no da uebercho, wo mir hend woelle. Und es isch mega fein gsi. Nei, weder Hund no Chatz! Zum das Ganze au wieder z´vodaue simmer uf dae Coit Tower gloffe. Ufae und abae. Uff… Und das bi 30 Grad … D´Ussicht het ues denn defuer entschaediget. Uf da abae hemmer ae Cable Car Fahrt und ae Maggie brucht. Am Obig simmer denn aebae im Bus zwuesched Obdachlosae (ca. 16 Joehrigi) glandet. Und au suscht sind Gstalte im Bus chli komisch gsi.

Egal, huet sind d´Twin Peaks ueses Ziel gsi. Mit Floepper hemmer de Ufstieg in Agriff gno. Au da hemmer gschafft. Schliessli lached mir gern ueber ues ! Und denn. Diae Ussicht. Eimolig. Eifach Uebersicht ueber die ganz Stadt und Umgebig. Und Frisco isch bekanntlich jo noed grad chli… Noegscht´s Ziel isch dae Golden Gate Park gsi. Und wieder dur aes komisch´s Viertel. Drum schnell wieder weg, und ab an Ocean Beach. Gstaerkt dur aen Cinnamon Roll (Danke Petra ) hemmer de Bus zur Golden Gate Bridge gno. Jetz isch diae au no pictured worde us de Noechi.

Da waer´s wiedermol gsi mit Tricks und Gaegs, tschou tschuess und ae schoene. Mir wuensched eu ae schoe ¨warms¨ (Radio Top seit jo, dass es besser und waermer wird ) und erholsams Wuchenend. Hebed eu immerno Sorg. Und vogaessed noed: i 2 Moenet isch Wiaenacht! Und aebae, jetzt alli mitsinge: ¨ Mir goend zu de 49ers, mir goend zu dae 49ers ¨…

Sunnigi Gruess us dae schoenschte Stadt Amerikas

Aendria aend Melaeni

Hallo Zockerfruendae!

Mir sind gfahre und gfahre und hend gwuesst, jetzt chunts denn: Las vegas! Wiae vo allne gross akuendt. Entweder hemmer scho z´viel gseh oder s´Waetter isch noed guet gsi (sunne und warm), aber aes haet ues noed sooo umghaue. Erscht wo mer ueber dae strip gfahre sind und dae Campingplatz gsuecht hend. Dae Andrea isch es eifach egal gsi, wo i dae Eiffelturm und New York und so wiiter gseh han. Sie haet mitem Camper eifach nu no use woelle. Ok, zruck uf d´Bahn und zum Sam. Vo dett mitem Shuttlebus zruck is Getuemmel. …Boah…d´Amis spinned wuerkli. Eifach ei Stross, en hufe Luet und die ganz Waelt eimol dargstellt. Mir hend da mit em einte oder andere Margherita fuer 99 Cent eifach mol uf ues iiwirkae loh…hui… Mir hend trotzdem en Huufae Pictures gmacht. Und viel schraegi und noed nu dicki Luet gseh. Oma und Opa im Casino?!? Denn hemmer ueses Glueck am Einarmige Bandit selber probiert. A dere Stell nomol aes herzlichs Dankeschoen an harte Chern fuer di grosszuegig Spend. Sorry min Aengel, as roulette hani mi noed gwogt. Aber da Geld isch guet i Margheritas investiert worde.

Sorry, Zwueschebemerkig: Wieso haets uf uesem Campingplatz am 19.Oktober ae Wiaehnachtsbeluechtig?!?

Zruck zu Vegas. Agfangae mit aem Brunch im Denny´s ( siehe Seite ¨WE LOVE…¨, Danke Kay fuer dae Tipp)  simmer dae Strip uf und ab gloffe und hend underem Eiffelturm aen Suennelistopp gmacht, bevor mir zu dae ¨Blue Man Group¨ gange sind. Wer d´Chance haet soell die Show (glaubs in Basel) au mol go luegae. Dae Hammer. Sogar die wo z´spot cho sind hends id´ Show ibaut ! Nei, mir sind´s noed gsi! Nach dae Show hemmer au mit ihne Pictures gmacht ! Mit dae Andrea haet er sogar gredt, obwohl suscht alles ohne Worte isch. A mir haet er nu dae Schweiss abputzt !

Ok, soviel zu Vegas. Jo, mir hend no Geld, mir choemed wuerkli erscht im Maerz zruck. Obwohl, mir hend nur zwei Taeg druf d´Geier ueber ues kreisae gseh. Mindeschtens 2 Mol. Mir sind naemli im Death Valley gsi. Drueckendi Hitz am tuefschtae Punkt uf dae Nordhalbchuglae und eifach nur riesegrosses Nuet! Do isch dae Tank no meh als halb voll gsi und uf dae Chartae haet´s au gar nueme wiit usgseh. Alles easy. Hemmer gmeint. Aber nei, do isch uf´s Mol aen ueble Pass uf ues zue cho. Mue da so toenae? Jojo, da isch noed so schlimm. Aber wieso toend denn d´Bremsae bie 9% Senkig nueme so raecht? Wiso?!?! Aso, d´Andrea haet nuem choene bremsae und haet ues scho im Graebli gseh… Nachere churzae Pause isch aber alles wieder ok gsi. Moment, wo isch s´Benzin ane? Wieso Isch do nienets ae Tankstell? Und scho wieder hend d´Geier gluuret. Uff, isch da ae Fata Morgana oder isch da ae Tankstell? Juhu, aes isch ae echti Tankstell und sogar no ae Schnaeppli…raeusper… Aber mir sind grettet gsi. Bis zum noegschtae Pass. Aber da isch nuem so schlimm gsi.

Do cha da noegscht Tag im Yosemite National Park nu besser werdae.

Mir hend zwor kei Baerae gseh, daefuer ae Miezekatze (Mountain Lion). Und denn diae gross Frog: Hend die groeschtae Wasserfaell vo Amerika au soviel Wasser wie dae halb votroechneti Fluss do une? Nei, denk noed. No weniger, naemli gar kei Wasser isch obe abe cho! Jaenu, zum Glueck gits Poschtcharte devo zum chaufae…

Aktuellschtae Stand: Nachdem mir frueh (wuerkli fruaeh, am 6.30!) zruck  zu dae Mammut Baeum sind isch´s nomol quer duer de Yosemite zruck gangae. Au huet hemmer kei Baerli gseh. Daefuer Aes Reh mit Kitz, spitzi Eichhoernli und aes Murmeli – Joeeehhh…!  Und etz hocked mir  bim Lake Tahoe und denked a eu… Aes isch u schoen do!

So, morn goht´s am Lake Tahoe entlang nach Sacramento (hend ihr gwuesst, dass d´Hauptstadt vo Calofornia vomene Duetsch-Schwiizer gruendet worde isch?). Und am Ziischtig goend mir bis am Sunntig nach San Francisco-mir freued ues jetz scho!

Guet, so far so good… Wir haben fertig. Luschtig hemmers au !

Vorwiaehnaechtlichi Gruess us em vorruckte Amiland

Pogy und Meller

P.S.: Oeppis muend mir no afuegae. Alli meined immer, mir seged nu zum shoppe z´Amerika. Debii mached mir das erscht in Frisco. Gsehnd mir denn so us?

…Oder die gross Frog: Wieso choemed 2 Schneefloeckli uf mi zuae?

Ihr gsehnd, nu 2 Taeg sind vogange und mir schriebed schowieder. Ha, mir hend halt ez aen chliine Laptop ! Und das dusse so cirka -3Grad Celsius haet, hemmer nuet bessers z´tuae. Jo ihr hend richtig glaesae! -3Grad Celsius!!! Und vor 2 Taeg simmer no im Traegi, Shorts und Floepper umeghoeselet!

Uf dae Fahrt nach Richfield uf uesem Waeg zum Bryce Canyon haets doch tatsaechlich gschneielet und isch a…chalt worde. S´isch alles wiis ueberzuckeret gsi. Nume zum das do grad mol klar z´stellae: mir sind a dae Chaelti, mit dene Waldbraend im Weschtae hend mir nuet am Huet. Nonig. Mir hend noed zueslet. Nei. Mir heized numme mit Gas.

Aber im Bryce Canyon isches trotzdem schoen gsi. Under azurblauem Himmel und bi Sunneschii simmer dick iipackt losgfahre. Scho bim erschtae Ussichtpunkt simmer zwuesched dae luechtende, orange Felsgebilde umegstifflet. Absolut geil gsi. Mir hend bim ufestiege sogar warm becho. Mit vielne Tee und WC Pausene i uesere fahrbare Wohnig simmer vo Viewpoint zu Viewpoint ghoetterlet. D´Andrea haet all die Rehli mit dae Kitzli immer frueh gnueg gseh und brav in rueh loh. Hend ihr gwuesst, dass d´Amis alli agfahrne Tierli (egal wie gross!!!) mittae uf dae Stross liegeloehnd? Da finded mir noed so schoen. Zruck zu dae laebigae Tierli. Leider hemmer weder Murmeli no Schwarzbaerae gseh. Aber defuer ganz viel Reh us noegschter Noechi.

Viel meh gits nuem z´saegae, ussert ab morn heisst´s fuer 2 Taeg: VIVA LAS VEGAS, und mir 2 Landeier mittendrin statt nur dabei ! Falls irgendae Meldig vo Amerika id´Schwiiz chunt, dass es 2 neui Jackpot Gwuenner git und ihr nuet meh vo ues ghoered: da waered denn mir gsi…hihihi

Hebed eu und euem Gaeld sorg (mir macheds schliessli 2 Taeg lang noed!). Hasta la vista, baby!

Heaps of greets, eui einarmige Bandite Andrea und Meli.

P.S.: wie bis jetzt jede Tag isch au gad etz ae Alarmalag losgange. Nei, au mit dem hend mir nuet z´tue…

Mir sind´s scho wieder! Wieso aecht da? Dae Kay het ues gseit, dass aes Baby-Laptops git, wo mae relativ guenschtig ueberchunt. Gesagt getan, mir sind jetzt stolzi Bsitzer vomene Asus (Manfred, dae lauft im Fall mit Linux )! Und nei, mir hend ues nonig drueber ufgregt. Drum gits d´Foeteli au nonig jetzt… Isch halt noed so dae schnaellscht. Roted mol, wora mir churz nach uesem Chauf vobiigloffe sind? Richitg: amenae Internetkafi. Und da im hinderletschtae Kaff!

Egal, zruck zum Dunnschtig. Am morge simmer in Richtig Page bim Lake Powell ufbroche. Aen See mitere mega intensive Farb und Gelb-orange Stei rondom. Hammerschoen. Nocheme Spaziergang hemmer wiedermol aes BBQ gmacht und sind zur abwechslig Mol frueh go pfuse. Defuer simmer vorem Sunneufgang wachworde und hend grad wieder druflosgfoetelet. Mir sind schliessli au Touris.

Ufem Waeg nach Kayenta haet d´Andrea ganz aellei muesae go tankae. I han noed woelle usstiege. Schliesslich sind mindeschtens 10 Huend eifach so umegschliechae. Aber sie hend haerzig glueget.. Am Nomittag simmer denn do in Moab acho. Hui, do luftets denn aber racht! hend chum choene schlofe, will dae Camper immer gwagglaet haet.

Huet morge hemmer uesi Plaen denn am Waetter muessae apasse. Drum simmer mitem Camper in Arches Nationalpark anstatt mit de Bikes oder mae Offroader. S´haet usgseh wie wenn´s gad uebelscht chiem cho raegnae. Glueck gha, s´haet ghebet und ufgrissae. Nu de Wind isch ues erhalte bliibe. Dae Park haet u laessigi Aersch…aeh…Arches. Sprich natuerlichi Steiboegae. Echt genial, wieder so roti Farbe, blaue Himmel… Mae wur gar noed denke, dass die bi dem Wind immerno stoend! Aber die Amis spinned echt. Do fahred die doch ueber die ganz Stross voteilt als HOCHZIITSGSELLSCHAFT zum Turret Arch go HUEROTE! Heieiei, die Hochziitsfotene woend mir noed gseh ! Hauptsach Show…

Fruesch gwoesche (Gratispeeling abputzt) schriebed mir eu da Brichtli. Mol luege, choennted jo wiedermol fruaeh go schlofae. Wiae jede Obig. Mir sind amigs raecht kaputt und mued vo all dene IIdrueck und Erlaebnis. Defuer mached mir ues am morge amigs au frueh uf d´Socke, damit mir au was vom Tag hend.

Ok, so far so good, jetzt mached mir no uesi ¨Best of Usdrueck¨-Lischte und denn waer´s wieder gsi fuer huet.

Hebed eu und eunae Liebschtae Sorg (mir passed au ufenand uf) und schoes Wuchenend (hemmer au )!

Lots of Love us de Saate, Andrea und Meli.

Hallo uesi Liebae!

Danke fuer die viele Kommentaer! Haet ues u gfreut und isch luschtig zum laesae! Liebae Reto, dank dim Biitrag muen ich (Meli) etz schriebe, d’Andrea cha s’10-Fingersystem tatsaechlich noed…

Aso, fanged mir nomol z’San Diego a. Am Samschtig simmer zum Free Willy…aeh, dae heisst jo in Wuerklichkeit Shamu… Im Sea World haets natuerlich au no anderi Tierli gha. Wie zum Biispiel die us dae Sesamstross, Flipper, Oskars (Seeleue, fuer die wo’s Conny Land nid kenned), Happy Feet (Pinguin), Lars (IIsbaere), so komischi gruusigi Seechueaeh, und vieli meh. Isch aen u schoenae und laessige Tag gsi. So schoen, dass es de Andrea gad en Sunbuerner vopasst het.  Am Obig hemmer ueses erschte BBQ gmacht. Very delicious !

Am Sunntig hemmer privat Service zum San Diego Zoo gha vom Mr. James. En cheibe glatte Busdriver, wo ues am Obig 4 CD’s vo sinere Radiostation for Education broennt haet. Zruck zum Zoo. Au dett haets viel Tielri gha. Mir sind uf d’Jagd noch Koalas, IIsbaerae, Elephantae, Affae, Pandas, Woelf, vielnae Voegel und Fisch. Binere Wildtiershow hemmer no chli Action gha: Dae Falkae isch anstatt ueber ues zu ihre uf de Arm eifach in Wald uf und devo.  Nach viel Pfiiffae isch er denn aber wieder zruck cho. Defuer het nocher de Wolf aes Bienli gjagt und isch schier duredreiht, anstatt dass er gfolget het. Mir hends luschtig gfundae ! Wa ues sit mer do sind no meh ufgfalle isch, sind die vielae dicke, chugelirunde Amis, wo ineschuffled wie bloed! Git oeppe aes luschtigs Picture ! Drum hemmer am Obed au mol da Amiaesse moesse usprobiere: Cheeseburger, Fries and Beer…

Am Maentig isch es denn ueber Yuma nach Lake Havasu City am Colorado River gange ( noed vogaessae: Haribo macht Kinder froh ). Aber bevor mir LOSgfahre sind z’S.D. hemmer no aen Mech brucht, will uesen Camper immer clickclickclickclick gmacht haet und s’Oellaempli scho gluechtet haet. D’Loesige sind denn aber ganz eifach gsi. Bim Clickrad muesch eifach heftig paarmol dragingge und s’Laempli eifach ignoriere. Ok, mached mir. Denn isch’s losgangae. Uf’s mol hemmer MIttae i dae Pampas moesse abbremsae und bimene Blinkiauto ahaltae. Doett isch aen junge Burscht in Uniform gstandae. Dae haet ues naebis gfroget, wo mer noed vostande hend. Nochdem d’Andrea zu mir gseit haet: “Red du, i vostoh nuet” antwortet ER wie miteme heisse Haerdoepfel im Muul: ” Ihr sprecht Deutsch? Mein Grossvater kommt aus Deutschland. Ich spreche wenig Deutsch!” Und ues het’s schier putzt vor lache und zu allem ane haet ueses WC asewaeg gstunkae, dass es sogar ues schier schlaecht worde isch… MIr hend dae Pass moessae zeigae, aes isch nu ae illegali IIwanderigskontrolle gsi. ENdli am Ziel hemmer gad no bim IIdunklae aen huebschae Campingplatz gfundae.

Am morgae simmer z’erscht Mol in Pool ghuepft und hend bitz planscht. Denn isch’s richtig Skywalk ufem Grand Canyon gange. Hemmer do aemel no gmeint… 14 Meile vorem Ziel hemmer das Ganze abbroche. D’Stross isch uebler als uesi schlimmschtae Feldwaegli gsi. Und da mit mae Camper- No way! Voellig gfruschtet simmer wieder umkehrt und in Starbucks. Nochem Kafi und em Donut haet d’Waelt schowieder ganz anderscht usgseh. Uesi Fahrt isch denn Danke em Spongebobb Squarehead wieder luschtig worde ! Denn simmer wiiter uf Williams gfahre, wo mer 2 Naecht naebed dae Bahnlinie schlofed. Isch mega chalt und luut.

Huet, doch no: Grand Canyon. MIt em Tschutschubaehnli simmer richtig Grand Canyon Village gfahre. Dett simmer mit mae Shuttle ad Kantae gfahre worde… boooaaaahey… Absolut gigantisch, umwerfend, unbeschriiblich, eimolig, genial,… Eifach dae Hammer. Mir hend ueber 100 Foeteli gmacht und eifach nur d’Iidrueck gnosse. Meh choemmer noed saegae, da mue mae erlaebt ha. Dae skywalk isch ues gad schnurzpiiepegal worde.

Und Jetzt sitzed mir do im mexikanische Restaurant mitere Margherita, im Radio lauft California Dreaming und mir schriebed eu.

S’Wetter isch bis jetzt dae hammer, schoen warm, sunnig, eifach zum gnuessae. Aessae tuend mir WUERKLICH ganz gsund bis uf ae paar Usnahme (Haembi und Churros). Ues gohts u guet, mir vostoehnd ues blendend und aes klappet alles wunderbar. Au am Camper gohts bis uf aes paar loosi Schrube guet.

Leider choemmer eu nu sporadisch ufem laufende halte-mir hend u huene Mueh, Internet z’finde. Und wenn, denn nu husch. Da hemmer ues eifacher vorgstellt do im Amiland. Drum: tschuldigung… 

Melded eu wiiter so fliessig, mir freued ues riesig und hend eis Faescht bim Laesae.

Hebed eu Sorg, mached’s guet und bis inere Wuche in Las Vegas? Hoffentli aber scho vorher…

1000 liebi Gruess, Andrea und Melanie

P.S.: D’Fotene liefered mir no, sobald mir’s uf CD hend. Sorry folks!

Amerika, jetzt haesch ues am Hals !

Nochdem mir ues vo uesnae Allerliaebschtae verabschiedet hend, hend mir ues uf dae Waeg zu uesem super Flugi gmacht. Zerrscht 1h 50′ noch London und denn noch churzem Guinesshalt witeri 11h noch L.A. Leider haets sehr viel quengelndi Gofae (Sorry liaebi Eltere) gha und de Flug isch recht astrengend gsi.

Und als oeb das noed scho gnueg gsi waer isch ueses Gepaeck in London bliebe… Daefuer hend mir denn scho de erst Promi gseh, dLindsay Lohan…

So Sind mir denn ohni Gepaeck is Hilton chauffiert worde. Det haemmer denn halt Omaunterhose kauft, tja wenigsens da hets gha…

Nochere churzae Nacht simmer uesen Camper go holae. 2h instruktion und denn muesch eifach Gas geh, OK da hemmer gmacht und sind nomel an Flughafe, witeri 2 h uf ueses Gepaeck go warte.

Nochdem mirs denn endli uebercho hend haemmer im groesste Firobigverchehr mit em Camper d’City durquert… Puh, da isch ues ae Lehr gsi! Scheiss L.A. Daefuer haemmer scho sHollywood Zeichae gseh…

Noch 10h verdientae Stund schlof simmer uf Newport Beach gfahre. Leider haemmer niemert vo O.C. California troffae. Aber isch glich u schoen gsi. Noch witere 2h 1/2 fahre simmer denn in San Diego acho. Aso do gfallts ues doch gad viel viel besser. Aen schoenae Campingplatz, netti Nochbere und eifach s’Lebe chli gnuesse.

Mir haend ues denn huet no is Old town gwogt und do isch es echt mega schoen.

Zum Glueck heand mir ez noch 1h sueche doch no aes Internetkafi gfundae zum eu chli brichte… mir haend aber leider sehr sehr wenig Zit drum mues es ez schnell goh… Die noechste drue Taeg bliebed mir ez chli do und lueged ues dae Free Willy (dmeli haet umbedingt wellae das i da schrieb) a und natuerli no vieles meh…

Da uesi zit ez denn gad abgloffae isch (bzw. ues dae Kafipurscht userueert) lieferet mir eu dfoeteli noegscht wuche mol no.

Aber ues gohts ussert chli Jet Lag sehr guet. Mir freued ues immer vo eu zghoerae (Kommentare do inae) nur leider choemmer noed immer alles Pronto beantwortae…

Bis zum noegschtae mol.

Hebeds guet.

Eui 2 Globetrotter

Meli und Andrea