meli
14.10.2008

Wann wirds mal wieder richtig Sommer…?

…Oder die gross Frog: Wieso choemed 2 Schneefloeckli uf mi zuae?

Ihr gsehnd, nu 2 Taeg sind vogange und mir schriebed schowieder. Ha, mir hend halt ez aen chliine Laptop :-D ! Und das dusse so cirka -3Grad Celsius haet, hemmer nuet bessers z´tuae. Jo ihr hend richtig glaesae! -3Grad Celsius!!! Und vor 2 Taeg simmer no im Traegi, Shorts und Floepper umeghoeselet!

Uf dae Fahrt nach Richfield uf uesem Waeg zum Bryce Canyon haets doch tatsaechlich gschneielet und isch a…chalt worde. S´isch alles wiis ueberzuckeret gsi. Nume zum das do grad mol klar z´stellae: mir sind a dae Chaelti, mit dene Waldbraend im Weschtae hend mir nuet am Huet. Nonig. Mir hend noed zueslet. Nei. Mir heized numme mit Gas.

Aber im Bryce Canyon isches trotzdem schoen gsi. Under azurblauem Himmel und bi Sunneschii simmer dick iipackt losgfahre. Scho bim erschtae Ussichtpunkt simmer zwuesched dae luechtende, orange Felsgebilde umegstifflet. Absolut geil gsi. Mir hend bim ufestiege sogar warm becho. Mit vielne Tee und WC Pausene i uesere fahrbare Wohnig simmer vo Viewpoint zu Viewpoint ghoetterlet. D´Andrea haet all die Rehli mit dae Kitzli immer frueh gnueg gseh und brav in rueh loh. Hend ihr gwuesst, dass d´Amis alli agfahrne Tierli (egal wie gross!!!) mittae uf dae Stross liegeloehnd? Da finded mir noed so schoen. Zruck zu dae laebigae Tierli. Leider hemmer weder Murmeli no Schwarzbaerae gseh. Aber defuer ganz viel Reh us noegschter Noechi.

Viel meh gits nuem z´saegae, ussert ab morn heisst´s fuer 2 Taeg: VIVA LAS VEGAS, und mir 2 Landeier mittendrin statt nur dabei :-D ! Falls irgendae Meldig vo Amerika id´Schwiiz chunt, dass es 2 neui Jackpot Gwuenner git und ihr nuet meh vo ues ghoered: da waered denn mir gsi…hihihi

Hebed eu und euem Gaeld sorg (mir macheds schliessli 2 Taeg lang noed!). Hasta la vista, baby!

Heaps of greets, eui einarmige Bandite Andrea und Meli.

P.S.: wie bis jetzt jede Tag isch au gad etz ae Alarmalag losgange. Nei, au mit dem hend mir nuet z´tue… :-)

  • 4 Kommentare
  • USA

4 Kommentare zu “Wann wirds mal wieder richtig Sommer…?”

  1. # Mirjam 14.10.2008 um 8:17

    Heya ihr zwei Reisegirls

    Es isch u spannend und unterhaltsam:-) vo eu zwei z’lese. Eui Reisebricht gfallet mir u und es isch als wör me gad mit eu reise.:-)
    Und händ ihr de Check pot knackt?:-)

    Wenn jetzt 8.15Uhr bi mir usem Fenschter luege, gsehn i gad nöd vil ussert Nebel und schmöck Zuckerrüäbäfabrik……isch so richtig Herbscht do im Schweizerländlä.

    Freu mi scho uf euen nögschtä Bricht. Machets guät and take care.:-)
    greets
    mirj

  2. # Meretam 14.10.2008 um 10:28

    Huhu dir Liebe
    Dänket dra, nid aues Gäud grad wider verspile, wo der gwunne heit =)
    I finge eui Brichte aso super, da chan i minere Vorschriberin nume zuestimme. Witer so, bi gspannt uf aues, wo no chunnt.
    Dicke Schmatz,
    Meret

  3. # Pascalam 15.10.2008 um 18:45

    Hallo Ihr Zocker

    ich setze 5 Dollar uf ROT. Ihr chönd mir denn de Gwünn geh wenn ihr wieder dehei sind ;-)

    Liebi Grüess
    Pascal

  4. # corneam 15.10.2008 um 23:33

    jojo, i weiss jo nöd…die tierli wo eifach so uf de stross sind….hend er scho büüle i de siitetüre und am chüelergrill, vom fangisspiele mit de reh und hirsche;-)s gäb amel no gueti bröte!! viellicht schickt eu de kay jo en spanferkerlgrill oder wenigschtens d aaleitig zu eim, denn chönd er das fleischangebot au nutze und euen spiiszettel chli ufmotze!! de phil hanget mer scho di ganz ziit i de ohre, we guet s fleisch us amiland doch segi.
    södeli, jetz no öppis aktuells für d andrea, mer sind üs scho ziemli einig, we üses turngwändli söll usecho. dä pris isch horrend, aber was sölls, mer hends jo sicher wieder zäh johr!

    vielicht chöntsch grad für de tr no 10 dollar setze, uf schwarz, und mit chli glück hemmer en sponsor für die aaleggi!

    glg corne