rondom

¨The Village¨ – bim Chief

Nabua Lodge

Honeymoon Beach

White Sandy Beach

Awesome Yasawa Flyer – ueses Wassertaxi

Kuata Natural Resort

Kava – Ceremony

Beachcomber Island

New Year´s Eve

Mana Lodge

Arielle – Ueses Surfergirl

Wo choented mir do aecht sii…?!?

Uesi schwedische Gspaenli

Blue Mountains – Three Sisters

Dae Gluehwii isch kochet, dGrittibaenze sind au scho parat;

mir sind fuer Wiehnachte in Fiji scho voll am Start!

Bi eu heisst sMotto: Leiset rieselt der Schnee,

mir hend defuer aen Daiquiri i dae Hand und werded dSunne gseh !

Bi ues het sviert Cherzli au scho brennt

und mir sind au scho ae paarmol mit de Chlauschappe am Strand umegrennt!

Leider choend mir eu das Johr nuent schenke,

mir verspreched aber, mir werded ganz viel a eu denke!!

Wahrenddem mir dSunne gnuessed,

ihr a Neujohr sFuerwerk in Himmel ue schuessed!

Egal oeb mir sind no oder fern

mir hend eu alli ganz fescht gern!!

Fuer Wiehnachte ae guets Faescht,

gnuessed dGselligkeit vo eune Gaescht.

Mir wuensched eu ganz en guete Rutsch is neue Johr

und hoffed all eui Traeum und Wuensch werded wohr!

Das waers gsi fuer die noegschte 2 Wuche,

mir choend jetzt sInternet nueme gebruche.

Gnuessed im alte Johr no alli Taeg,

bliebed wie mir munter und zwaeg…

Us Fiji gruessed

2 Daiquiri-trinkendi Chlaeus

Hallo liebi Grittibaenze!

Jo, so schnell goht da, jetzt isch scho s´dritte Cherzli azuendt! Und bi ues wird´s jede Tag waermer! Und inere Wuche grilliered mir ues scho uf Fiji am Strand! Und wa mached ihr so? Hender scho alli Gschaenkli? Sind ihr fliessig am Gluehwii trinke? Uesen wird jetzt denn grad kochet ! Isch aes guete Schnee zum Schneemanne und Fraue baue und Schneeball schuesse?!?

So, jetzt aber dae Reihe no, eis um´s ander. Mir hend ues die letscht Wuche uf d´Spure vom Frodo und sine Kumpane begeh. Fuer alli Nichtwissende: Herr der Ringe isch in Neuseeland dreiht worde! Z´erscht hend mir ues in Napier mit neue Chleider ideckt, bevor mir nach Turangi gfahre sind. Mit mae ¨No worrieff¨ simmer herzlich begruesst worde sowie miteme ¨Life iff Paradieff. Relaxff, take a Ffunbaff!¨. Mit andere Wort: Dae lispelnd Hostdaddy haet ues so woelle saegae, dass mir noed so gstresst sii soelled. Wieso er da gmeint haet wuessed mir bis huet noed. Egal, am Dunnschtig, aem schoenschte Tag vo dae Wuche, hemmer s´Tongariro Crossing gmacht. Da isch ae 7-stuendigi Wanderig wo under anderem zum Vulkan fuehrt, wo als Mordor us Lord of the Rings bekannt isch. Dae Frodo ruehrt dett am Schluss dae Ring ine. Mit dene tuerkis Seeae, aem rote Krater und dae Landschaft an sich haet´s sich mega glohnt. Nu leider isch dae erhoffti Muskelkater usbliibe !

Dae noegschti Halt isch Rotorua gsi. Da isch dett, wo´s nach fuule Eier stinkt. Mir saeged jetzt noed, was mae mache chan, ohni dass es oeppert merkt. Ihr toerfed selber rote. Vo dett simmer zum Kiwi Encounter gfahre. Juhu, mir hend gliich no echti Kiwis (2-beinigi Voegel!) gseh! Joeh… Hend ihr gwuesst, dass sie churz vorem Ussterbe sind? Und dass aes Kiwi-Ei z´werfae so isch, wie wenn ae Frau aes 17 kg (!!!!!!!!) Baby uf d´Welt bringe wuerdi!

Am noegschte morge hemmer aen Geysir und anderi beiidruckendi vulkanischi Erschiinige gseh im Wai-O-Tapu Thermal Wonderland. Meh dezue bi de Fotene. Und denn…uiuiui…denn simmer nach Hobbiton dueset. Na? Na? Wer kennt da? Jo, richtig, das isch s´Auenland us Herr der Ringe, am Frodo sini Heimet! Und mir zwei eimol meh mittendrin, statt nur dabei! Uiuiuiuiui… Nei, mir hend ues noed wie chliini Chind gfreut. Hend ihr gwuesst, dass dae Baum ueberem Bilbo Beutlin sinere Hoehli noed scho immer dett gstande isch? Dae hends amene andere Ort gfunde, 2000 mal gfoetelet, i 200 Stuck gsaget und nummeriert und denn genau dett zaemaegschrubet und drohtet. Zu guter Letscht hend Studente x-tuusig kuenschtlichi japanische Blaetter dran befeschtigt. Und au suscht simmer ueber oepae aen Bschiss ufklaert worde.

Nachere Nacht nume mir 2 imene herzige Hostel simmer an Hot Sand Beach. Dett choend sich d´Touris ae Badwanne schufle. Dae suettig heiss Sand waermt denn s´Wasser. Autsch, da isch abartig heiss! Da haltisch noed us! Wo au mir 2 mit em Schuefeli agfange hend buddle isch dae Luzerner ues cho haelfae. Dae Martin kenned mir nume, will d´Andrea ihres Bikini i dae Lounge gflickt haet und per Zuefall i dem moment d´Frog gstellt haet:¨Oeb´s aecht doof usgseht, wenni do am neihe bin?¨ woner ine cho isch. D´Antwort isch pronto uf luzernerisch cho:¨ Jo¨ !

Nachem Abstecher uf Coromandel simmer gescht viel gfahre. Nume de groeschti und aeltischti Baum isch ues aen Stopp Wert gsi. Jetzt huused mir in Paihia und hoffed, dass mir morn bi Sunneschii choend go saeglae und mit dae Delphin go schwimme. Drucked ues bitte d´Dueme!!!

S´Wort zu dae Wiaehnachte ueserersiits folgt, sobald uesen Gluehwii und d´Grittibaenze parat sind. Stimmung !

Da mir noed wuessed, oeb´s in Fiji Internet hend, isch da viellicht s´letscht wo ihr da Johr vo ues ghoered. Herzlichs Dankeschoen fuer eui treu Ufmerksamkeit. Mir wuensched eu besinnlichi Feschttaeg und ganz aen guete Rutsch is neue Johr.

Eui treuergaebnae

Andrea Tobler und Melanie Stock

Tongariro Crossing

Wer gseht dae Schneeball ?

Kiwi Encounter

Wai-O-Tapu

Hobbiton

Hot Sand Beach-Mit aem Martin am schuflae -MERCI!!!

Andrea und Meli bereited sich uf d´Turnfeschtsaison vor!

D´Andrea cha immerno dae Spagat !

…Hou hou hou… Wenn ihr da laesed, heisst da, dass de Samichlaus eu noed mitgnoh haet. Aber so wie mir eu kenned, hender eifach d´Ruete uebercho. Zum Glueck gits de Samichlaus z´Neuseeland noed !

Denked mir mol 1 1/2 Wuche zruck. Do simmer no in Hokitika gsi. Doett haet ues dae Steven biibrocht, wie frau Chnoche schnitzt. Sit doett simmer stolzi Bsitzerinne vo selbergmachte Schmuckstueck. Und jo, mir hend u fescht Freud dran und sie gfalled ues mega. Wiiter simmer nach Greymouth gflitzt. Nei, wa denked ihr au vo ues: Mir sind KEI Flitzer !!

Chum simmer acho isch es au scho zu dae Pancake Rocks wiitergange. Mol isch no raecht cuul. Awesome. Excellent. Sweet as. !!!!!! Als ob einae Steiplatte wie Pfannchueche ufenand bige hetti. Und noed nu 5, sondern 1000i! Am Samschtigmorge haet dae Tag so richtoig agfange, wie´s sii soell. Mit mae Bierli zwei. Nei, da mached mir noed jede Tag. Wuerkli, ihr moend gar noed dae Chopf schuettle! Mir hend dae Monteith´s Brewery aes Bsuechli abgstattet. Joeh, isch diae herzig. Aber s´git guets Bier. Hend ihr gwuesst, wie´s Radler entstande isch? Ae Horde Velofahrer haet aen Gaschtwirt ueberfalle und dae haet Angscht um sin Biervorrot becho. Drum haet er churzerhand Limonade drundergmischt. Und wenn wunderts, d´Radler hend da sehr erfrischend gfunde und s´Radler isch gebore. Schowieder oepis glernt. Da muen maengmol sii, will wenn mae ues zueloset choent mae scho chli meine, mir zwei beidi vobloeded mol no uf uesere Reis…

Anstatt nach Nelson z´fahre wie geplant simmer gad vor d´Tore vom Abel Tasman Nationalpark gfahre, naemlich nach Marahau. Vo dett simmer am Sunntig zum Wharaiki Beach, aem Farewell Split und dae Pupusprings gstartet. Eis Highlight haet s´ander gjagt. Z´erscht dae unglaublichi, menschaeleeri Beach miteme surfende Seehund, wiiter zu dae kuhle Seezunge bis ues schlussendli d´Quellene zum stuune broocht hend. Uf da abe hemmer gad noe s´erscht Adventscherzli azuendt.

Am Maentig simmer mitem Wassertaxi an Afang vom Abel Tasman gfahre und vo dett us ca 4 Stund gloffe. Dur Raegewaelder hemmer immer wieder zu Beaches gseh, wo so unglaublich tuerkis-blaus Wasser uf hell- bis dunkelgaelae Sandstrand trifft. Wiae i dae Karibik. Cuul. Awesome. Excellent. Sweet as. Viellicht no churz als Erchlaerig: So Sache wie ¨Sweet as¨ und ¨Cuul¨ isch bi dae Kiwis i jedem Satz jedes zweite Wort. Egal, um was es goht. Aber isch cuul ! Dementsprechend gseht uesen Wortschatz jetzt us…

Ziischtig. Eimol meh, eis Highlight jagt s´andere. Z´erscht s´zweit Winnie-the-Pooh-Adventskalender-mit-Schoeggeli-Toerli ufmache, denn bi strahlendem Sunneschii duer dae noegschti Abschnitt vom Abel wandere und denn… Laeck, i het d´Heidi schier ueber de huufe gfahre, woni sie gseh han, so hani mi gfreut! Mir hend ues zumene Chlaus-Gluaehwii-Grittibaenz-Obig troffe. Hei, isch da aen glatte Obig gsi… !

Nachem yummy z´Morge sind mir 2 wieder in Abel. Dae letscht Abschnitt no go aluege. Boah, mir sind echt angetan vo dem ganze Park! Am Obig het ues aen ４joehrige Bueb underhalte. I daerae Nacht het´s ues schier usem Bett gruehrt wo imene Zelt gstande isch, so haet´s gstuermt!

Und scho isch Nelson a uesem Waeg glaegae. Isch ae u herzigi Stadt. Wo mir duer d´Strosse gschlenderet sind isch ues aes Kino ueber dae Waeg gloffe. Dae Daniel Craig haet ues ase aglaechlaet, dass mir eifach noed hend choenne Nei saegae und aem James Bond aes Bsuechli abgstatted hend. Schliessli hemmer woelle wuesse, welle vo uesne Manne raecht haet (gaell, Kay und Paesci)!

Nach dem churze Stoppover het´s ues nach Kaikoura zogae. Natuerlich und wiae immer simmer noed grundlos dett ane. D´Wal hend nach ues grueft. Dem Ruef sind mir natuerlich gfolgt. Am Samschtigmorge simmer mitem Kutter is wiite Meer usegfahre. Mir hend ues wie dae Moby Dick gfuehlt. Und siehe da, welch Zufall: Aen Walfisch. Aen Sperm Whale. Dae Viertgroeschti uf dae Waelt. Und nomol eine. Und jo: Mir hend ae Flosse-Foti, aen Klassiker! Heieiei, hend mir ae Freud. Und s´noegschte Highlight isch gad hinedriicho. Ueberall Delfin, soweit das Auge reicht. Cirka 300 a dae Zahl hends ues gseit! Sweet as. Awesome.

In Picton hemmer gescht chli d´Sunne gnosse und aen gmuetliche Videoobig gmacht bevor mir huet frueh am morge uf sind zum d´Ferry z´catche ! Liebi Luet, merked eu, ein fuer alle mal. Mae wird au bruun wenn´s windet. Noed umesuscht heisst dae Titel ¨2 Pandabaerli…¨ Mir hend naemli ufem Vorderdeck a dae frische Luft d´Sunnebruelle agha . Und mir sind 3 Stund gfahre… Haejo, Pandabaerli sind jo herzig, oder?

In Wellington simmer guet acho und hend jetzt no bis am 21.Dezember Ziit mit uesem wiisse Corolla d´Nordinsle unsicher z´mache.

Mached brav jede Tag eues Toerli uf! Au Paeckli vom Adventskalender werded nur eins um s´andere ufgmacht, liaebe Kay und liaebe Paesci!! Aessed chli Guetzli fuer ues-spanischi Nuessli und Schoeggeli hemmer scho gha! Gnuessed dae Schnee und d´Chaelti-mir gnuessed d´Sunne und dae Strand.

Hou hou hou

Euen Samichlaus mit Schmutzli (im Bikini mit dae Pandagrindli )

Pancakes Rocks

Andrea haet ¨oazopft¨ ! Monteith´s Brewery

Whairiki Beach

Farewell Split

Pupu Springs (Frischwasserquellen)

Abel Tasman Nationalpark

Schwiizerobig mit Gluaehwii, Grittibaenz und Heidi

Flipper und Sperm Whale

Impression-sind diae Wolke noed awesome

Kia ora oder Servus us dae Bergae !

Am noegschte Tag simmer scho in Queenstown glandet. Do fahred mir doch grad mit dae Schwiizer-Gondola uf dae Hill ufae. Wooow, diae Ussicht! nachdem mit alles abgfoetelet hend simmer go Luge (chliini Waegeli aehnlich wiae bim Rodle) fahre. Wieder im typisch touristische Oertli acho simmer go zNacht aessae. Zruck i uesem Shared-Room mitma Kanadier und mae Englaender hemmer bis i alli Nacht inne mitem Marcus ueber Gott und die Welt gredt.

Uiuiuiuiui… Am noegschte Tag heissts Jetboat fahre ufem Shotover River! Dae Junior haet ues sicher duer dae Canyon brocht. I andere Wort: Du meinsch di ganz Ziit, aes taetschi di in noegschte Felsae, du machsch 360 am andere und da Boetli goht ab wiae aes Zaepfli! Awesome, cool,… Will da noed dae ganz Tag gange isch simmer am Obig no is Kino ues koeschtlich go amuesiere. Wieder im Hostel hemmer eimol meh mitem Marcus politisiert und bis in alli Nacht inne plaeuderelt.

Am Samschtig hemmer ues uf dae Waeg zu dae Moeraki Boulders gmacht. Das sind chueglirundi Stei on the Beach, wo teilwiis sogar ufplatzt sind. Siehe Pictures. Grad naebed uesere Accommodation uf Otago Penninsula bi Dunedin haets ae Pingu-Kolonie gha. Do hemmer eifach ae Tour moesse mitmache! Mit mae Shuttle simmer richtig Strand gfahre, wo mir dur tuefgleiti Waegli wiae Pinguin dur dGegend gwatschlet sind… Mir hend aes paar Gelbaugepinguin vo ganz Noech choene beobachte. Mir sind sozsaegae uf Pingu-Jagd gsi… Uf das abae haets frischi Sparglae (will do isch Sparglaeziit) und Avocado geh.

Dae Nugget Point isch am Sunntig uf uesere Lischte gstande. Aen chliine haerzige Luechtturm (Gruess am Beno ) ufere Landzunge, eifach breathtaking!! Am End vom Tag simmer scho in Te Anau acho.

Bi schoenem Wetter simmer aen Tag spoeter zum milford Sound gfahrae. Oeb dae Frodo aecht au scho do gsi isch?! Mit mae Boot simmer dae Fjords entlang gfahrae. Hei sind mir vostrublet gsi vo dem Wind. Und als ob mir no niae aen Wasserfall gseh hetted hemmer alli 100 abgfoetelet… Aber isch mega iidruecklich gsi, all diae steile Felswaend usem Wasser userage zgseh… Und denn haets agfange raegnae.

Hopplae, huet raegnats immerno. Aso, eigentli lohts abe wie us Chueblae! Wills aber erscht dae 2.Tag i uesne 8 Wuche Ferie gsi isch, hemmer ues sogar drueber gfreut. Im Gegesatz zu dene, wo am Morge zunere 3taegige Wandertour ufbroche sind. Guet, was stelled mir a? Zum Glueck hend mir no ae Adressae vom Diener, wo ues zu 2 uusgwanderetae Schwiizer Farmer fuehrt. Oeb mir wuerkli eifach so uftauche choend, ohni dass mir ues je gseh hend?!?! Jo chom, mir goend mol go luege. Eigentli hemmer nur dae Gruess woelle ueberbringe, aber scho simmer am Mittagstisch ghoecklet, hed Chueh gmolche (ime 50er Karussel fuer alli Tschegger ) und scho simmer am znachttisch gsaessae. Tocktock, no meh Schwiizer choeme uf aes Bierli und aen Schnupf. Schlussendlich hemmer sogar dett toerfe pfuse-so liaeb!!!

Noch mae feine schwiizer zMorge hemmer ues schweren herzens vom raphi, dae Bettina, aem Walti und dae Roxy voabschiedet. Uesen waeg haet ues ad weschtkueschte gfuehrt. Nachere Fahrt dur ae unglaublich abwechsligsriichi Landschaft simmer in Fox Glacier glandet. Aber uf dae Gletscher simmer noed gange, Gletscher hemmer au di hei… !

Defuer simmer am Morge zum Lake Methedson gange und eimol rondom gloffe. Aes haet sich echt glohnt, s´spiegle vo dae Bergae und aem Himmel isch echt ¨…wooow…¨ gsi! Wo mir denn dae Fox Galcier hend woelle aluege hets gheisse ¨Sorry, gschlosse waege gfluetete Strosse…¨. Guet, denn fahred mir halt zum Franz Joseph Gletscher! Schlussendlich simmer do in Hokitika glandet, dae Heimat vo dae Jade. Trotzdem goemmer morn go ¨Bone carve¨-mir mached ues uesen eigne Schmuck.

Falls mir vorher nueme vonenand laesae soetted, wuensched mir eu aen schoene erschte Advent, denked a ues bim Gluehwii choche und Guetzli bache! Aessed doch alli eis fuer ues mit! Und viel Spass bim erschte Toerli offnae! Mir hend sit huet au je uesen eigne Schoggiadventskalender ! Und huet hend mir s´erscht Mol ¨Last Christmas¨ ghoert!

Hebed´s schoen kuschlig warm-mir hends au 8-D ! Gnuessed d´Adventsziit!

Liebi Gruess mit viel Sunnestrahle

ANDREA und MELANIE

Lake Tekapo

Kiwi…

Queenstown

Vor dae Luge-Fahrt; Safety first!

Jet Boat ufem Shotover

Moeraki Boulders

Pingu!!!

Jede Obig, wenn s´Mannli Hei chunt, saeged d´Pingu ¨I love You¨ und s´Mannli bringt Holz id´ Huette. Liebi Schaetz:Mir waered au mit Blueme z´friede… !

Nugget Point

Gruess an Benno

Milford Sound- oeb aecht dae Frodo au scho do gsi isch?!?

Dae Kea haet uesen ZoomZoom agriffe..

Bsuech uf dae Schwiizer Farm – Haemaet

…wer henkt do im Melchkarussel ae Chueh a?!?

Schnupfrundi-100% schwiizerisch

On the road again!

Uesi Ersatzfamiliae

von links nacht rechts:Flipper, Saam, Frodo und Shamu

Lake Methedson

Franz Joseph Glacier

Green Sand Beach Big Island

Black Sand Beach und Turtles

Lava Tree Monument

Lava fluesst is Meer

Barbara und Ernie ¨Ersatzeltere¨

Lucky Farm B & B

Maui Northcoast

Nei, mir sind nonoed in Asiae   – uesen TV Wailuku

Hector Dolphins (New Zealand)

So, jetzt melded mir ues wiedermol! Jo, aes git ues no!

Mir mached ues grad en gmuetliche Obig in Twizel (NZ) mit Brot, Kaese, Salami, Olive und mae Schlueckli Rotwii (oder gad ae Flaeschae ). So typisch schwiizerisch halt!

Lueged mir mol ae Wuche zwei zruck. Nachdem mir 2 Taeg im Volcano Nationalpark vobrocht hend, hemmer selbschtvotuerlich no echti Lava woelle gseh. Guet, goemmer zu dem Touri-Punkt. Und tatsaechlich, aes Fuerwerk isch aen Seich daegege! Aes isch wuerkli iidruecklich, wie d´Lava dae Berg ab und is Meer fluesst. Mir sind jo Glueckschind und hend drum au d´Lava spucke gseh! Aecht kuhl!

Und scho hemmer ues moesse vo uesem ¨Ersatzmami¨ und vo uesem ¨Ersatzbapi¨ voabschiede. wiiter isch es eimol rondom gange um Big Island. Hey, so nett. Eimol meh hends kei Wasser d´Wasserfaell ab loh. Defuer simmer in Botanische Garte. Dae isch voll dae Hammer gsi, aber d´Moskitos hend sich ab ues de ranze voll gschlage. Am Obig bim neue B&B haet sich d´Andrea gfroget: isch das es Loch oder chani do abefahre?!? Mol, fahre isch gange, dae silverstar isch eifach en Seich daegege, ase steil!!!

Nachem Hammer z´Morge (haet gschmoeckt wie Pastetli mit Braetchuegeli!) haet ues d´Johnsie eri Coffeefarm zeiget. Churz 40 voschiedeni aessbari Fruecht, wo mir ues vor allem a dae Macadamianuess, Passionsfruecht, roti Bananae und Avocado bedient hend. So fein, viel meh besser wae di Hei! Nacher simmer mitem Kayak go schnorchle. Wow, so viel bunti Fisch (ganz vieli vom Nemo) hemmer gseh und sogar ae Schildchrot! Vo dene hend mir am noegschte Tag no meh gseh, wo mir am Place of Refuge gsi sind. Am schwarze Strand hemmer sogar en Huufe Spinner Dolphins gseh. Die sind abgange, da glaubt mae gar noed!

Oje, schowieder fluege, damal uf Maui. Am Flughafe haet aes persoenlichs Taxi uf ues gwartet. Aes Gymnaestrada-Trachtegriff-Gspaendli (Corinne vo Turbethal) vo dae Andrea mit dae Sabi. Per Zuefall sind sie au im ¨Banana Buengalouw Hostel¨ gsi wie mir. Dett hemmer no aen andere glatte Schwiizer kenneglernt, dae Mathias. Dae isch am noegschte Tag au uesen Tourguide worde. Mir hend die schoenscht Stross vo dae Waelt gseh mit 600 Kurve und sind im Raegewald aen Wasserfall go aluege. Woooow…

Und schowieder isch es go schnorchle. Plus ein Schwiizer meh, dae Ueli. Eimol meh hemmer bim schnorchle ae Schildi gseh und erscht no aen Manta (Roche)! Bim Apres Schnorchle hemmer mit uesere 6er-CH-Truppe aen TV gruendet. Dae TV Wailuku isch i daera Nacht bi Maegis und Bier gebore!

Am noegschte Tag simmer drum nume fuul am Beach glaege und hend aen gmuetliche Abschiedsobig in Maui gmacht, bevor mir am Friitig uf d´Superferry nach Honolulu hend moesse. Bonine sei Dank isch ues noed schlaecht worde. Defuer hemmer ae raechti Schiiebe binenand gha wo mer in Honolulu acho sind.

Und scho simmer im Flugi nach Sydney-Christchurch gsaesse. Hoppla, da isch raecht ae gwaggligi Aglegeheit gsi, Wind sei Dank. Denn isch aes au no dunkel worde, dae Goof naebed ues haet nu no gschraue und mir hetted bim Sturzflug am liebschte mitgmacht. Zum Glueck isch ueses Omaunderhoesli troche bliibe…

Uiuiui, da isch jo wie Heimat, mir hend aen Mazda 3! Aber Gopf nomol, wieso isch da Stuerrad raechts? Aber mir 2 Tschegger packed da scho ! So simmer uf dae lingge Stroossesiite zuae dae Nicole Scheuermann kurvt. Nomol ae Stuck Haemaet mit richtigem Brot und Nesquik-Milch zum z´Morge…fein…

Am Ziischtig simmer in Akaroa uf aes Boot gange, chli d´Gegend go erkunde. Aen Flipper! Nomol ein! Aen Siech voll! Und wa fuertig! Die gsehnd us wie wenn sie dae Grind itaetscht hetted und ae Pandamaske agleit hend! Die chliinscht Delphinsorte und sehr gfoerdet, dae Hector Dolphin! Und 3 Pinguin sind au umepaddlet! Joeh, we love animals!

Huet simmer is Herr der Ringe Gegend gfahre. Bim Lake Tekapo simmer dae Hill uf go stuune. Diae Landschaft isch dae Hammer. Und d´Farb vom See: tuerkisblau, sowas hemmer no nie gseh… Eifach umwerfend!

So, da langet. Aber hey, endli isch aes am 21.00 no hell! Hajo, mir goend gliich bald go pfuuse. Schliessli warted morn d´Rodelbahn uf ues !

Bached schoen Guetzli und Grittibaenzae, baschtled a dae Adventskalender. Mir hend da fuer uesi 2 Schaetz scho im September gmacht!!!! Drum chaufed mir ues eine mit schwiizer Schoggi!

Hebed eu Sorg und hebed eu lieb! Mached mir au immer !

Bis zum noegschte Mol, eui treue Schrieberinne

Andrea und Melanie